Gustamodena.it - Trova e Gusta ristoranti a Modena e provincia
Benvenuto, serve aiuto? Clicca qui Benvenuto! Registrati oppure
Accedi attraverso il Gustanetwork

La lavagna - Modenesità

Sproloquio 1997

GROG
Scritto il 21/02/2009
da GROG
SANDRONE: Zemiàn Zemiàn e Zemiàn ariós, mudnés ch'andê a pê o in spìciola e mudnés huslerdipendenti, zitadèin a bassa e alta velocità, a-v salùt tótt quant in màsa. Anch st'an a samm chè, nonostante la neurotassa e tótt chi èter azidèint chi s'han impruméss, a fèrv al nòster descórs da sté bèl balcòun. Speràmm sól ch'al tègna bòta, perchè, per via dal taramòt, a gh'è gnû 'na quèlch fàssa. Nonostante tótt, a-v vàd soridèint, bê biànch e ràss ch'a fê vóia...

SGORGHIGUELO: Bèda, papà, che i rédden per a-n piànzer...

SANDRONE: Tés gabiàn, che ai mudnés, portatori sani di buche in del strèd, a gh'ho da dìr di quê importànt. Alóra, cus'in gi-v dal Piano del traffico? Al dév éser pròpia un quèl diffìcil, se quî dla Cumùna i l'han fat fèr préma a Fauchè, pò a Huslèr e adèss, per azùnta, a l'inzgnér sguézzer i gh'han méss atàch anch un tècnic iraniàn! A gh càla pòch che al pòst di fìlibus, l'Azienda la màtta sò un servézi ed camê e dromedàri...

SGORGHIGUELO: Forse, papà, i sréven piò puntuê, piò econòmic e anch piò ecològich... Vè, al sè-t che al Piano del traffico i gh'han bèle cambiê nam?

SANDRONE: Mo' va là. E cum'a-s ciàmel adèss?

SGORGHIGUELO: Adèss, al Piano del traffico a-s ciàma... Traffico del piano, perchè piò piàn d'acsè, in màchina e in fìlibus, i mudnés i-n gh'én mai andê... Comunque, al probléma di parcàg' Huslèr al l'ha bèle che risòlt...

SANDRONE: E come?

SGORGHIGUELO: Per forza. Vést che in cèinter i comerciànt i sèren tótt i negòzi, Huslèr l'ha decìs che al sô pòst al gh fa sól di garag'...

SANDRONE: Va là imbambî, l'ètra sìra a l'ustarìa i m'han détt che Huslèr l'è un inzgnér ed préma...

SGORGHIGUELO: Sè, ed préma dla guèra...

SANDRONE: Tès, zócca, t'em fê pérder al fil dal descórs... A vlìva dìr ai nòster ministradór: s'a duvî fèr di cantér per giustèr el strèd dla zitê, mitìv d'acòrd cun quî dl' acqua, dal gas e dal teléfon. El bùsi fèli tótti insàmm, in 'na vòlta sól... Dèv 'na telefonèda fra vuèter... E s'a vlî sparamièr al getòun, a-n ve preocupèdi, zuntèl in dla bulàtta. Tànt, ràtt per ràtt...

SGORGHIGUELO: Cusa t'é-t ràtt, papà?

SANDRONE: Mo' c's'è-t capî, galbéder? A vlìva dìr che fìn a soquànt més fa, a-n se psìva brìsa girèr dai gràn bus ch'a gh'éra dapertótt. Un lonedè, a sun gnû al merchê per di interèsi. A mumèinti a restèva incastrê cun al baròz in un ed chi fòs chi fan per giustèr el strèdi. Dàp un mès, al fòs al gh'éra incàrra...

SGORGHIGUELO: Un més dàp? Vè, papà, s't'vê in dla via dal Teàter Comunèl, a gh'è un cantér ch'l'è avért da almeno dû an! Pare che Giuliano, al nòster séndech, al vóia entrèr in dal Guinnes dei primati per la strèda piò lànga dal mànd...

SANDRONE: Mo' se cla strèda lè, ch'i l'han batzèda da pòch "via Goldoni", l'è langa sè e no come al curidór ed cà nostra...

SGORGHIGUELO: Bèda che al primato, al séndech, al le vól ciapèr ménga per la lungàzza dla strèda, ma per la lungàzza di lavór...

SANDRONE: Al primato, cum'et di tè, al gh'l'ha bèle per via Taglio, ch'l'è in scaravòlta da circa trî an... A srév ora, anzi, che in dal Tài i-gh déssen un tài...

SGORGHIGUELO: Papà, vó-t savèr l'ùltma? I m'han dét che, l'èter dè, l'ascensór ai lavór pùblich l'ha propòst a quî dal Cuntry Club ed spustèr dal Clumbèr a via Emilia i camp da gòlf...

SANDRONE: E lór han-i acetê?

SGORGHIGUELO: Per forza, i-gh fan anch al scòunt dal trî per dû... Quî dal gòlf i pèghen dô bùsi e la Cumùna la gh'i-n dà trê...

PULONIA: Mo' tótt sti bus i stumparàn pór, 'na bòuna vòlta... L'è stê bòun ed stumpèri Prodi, che di bus in dal bilancio dal Stèt al n'avìva bèin de piò, vlìv ch'a-n sia brìsa bòun Barbulèin? Al màsim, per parzèr i còunt, al farà anca lò di aumèint "prodi... giosi".

SANDRONE: A Giuliano a gh vói dir ch'al dév fèr quèl anch per 'sta piaza chè, ch'l'è sèimper vóda...

PULONIA: �t gh'é pròpia ragiòun, Sandròun!

SANDRONE: S'a-n gh fóssen nuèter trî a impìrla 'na vòlta a l'an... Ed dè, a gh'è sól di pensionê piò o méno beby ch'i vànden di arlói piò o méno farlôc. �d sìra, a-n gh'è n'anma vìva... Adès pò ch'i han srê tótt dû i merchê, quàl ed piàza Venti e quàl ed via Albinèli, a-n gh'è gnanch piò i camél... Giuliano, a m'arcmànd, sgàget a purtèr i merchê n'ètra vòlta al sô pòst...

PULONIA: E po' Sandròun, a gh'è n'èter quèl... Chè in piàza, i gh'han méss di giaròun che per girèrgh in zémma agh vól del schèrp come chi truncàtt chi' dróven i zóven ed zitê. Han-i ménga pensê a quìlli come mè, ch'el gh'han sól di cràss e di duròun?

SGORGHIGUELO: E quî come mè ch'i gh'han i pê dólz?

SANDRONE: Mè a vrév pròpia savér, Pulonia, da chi l'ha tòlt tô fiól, che mè a-n gh'i ho ménga...

PULONIA: Te-n vrê ménga fèr la próva dal DNA per di pê dólz, ahn...

SANDRONE: A gh mancarév èter! Piotòst a vói dir: via Emilia, via Farini e San Chèrel égli én dvintèdi un depòsit ed biciclàtt... Chè bisàgna fèr quèl in prèsia, ch'a-n n'è ménga un bèl vàdder... Ma i vìgil cus'agh stàn-i a fèr?

SGORGHIGUELO: I vìgil? Mo' al sèt, papà, chi én 'na specie protèta in via d'estinziòun... I fan pèrt dla categoria "uccelli di bosco", perchè a-n s'è incàrra capî come mai piò i gh'in màtten, meno a s'in vàdd...

SANDRONE: E chél biciclàtti verdi méssi a gràtis da l'aministraziòun per tótt i mudnés? Che fìn han-li fat? A-n s'in vàdd piò... Per mè, o i li han rustìdi o la Cumùna la li ha vindùdi a la Lega per cla gita sul Po.

SGORGHIGUELO: Papà, a propòsit ed cosi séri, ma quand finéssn-i i lavór dal cavalcavia dla Nonantolàna? I vàn piò adèsi di lumègh...

SANDRONE: A-n se sa ménga. L'ùnica la srév fèr un èter ipermerchê a Navsèl e ciamèrel "Piccola Emilia"... Vó-t vàdder chi finiréven i lavór incàrra préma ed tachèri... Piotòst, a-v dév dir un quèl: in campagna la va mèl e po' la cràs. Per via dal tròp lat, a-s tucarà fèr un grapp in di cavdèin dal vach. La Pulònia l'a-n pól piò vànder i cunéi e i óv in négher, per pavùra che i cunfinànt i ciàmen al 117. E Sgurghéghel l'è incàrra disocupê...

SGORGHIGUELO: Papà, e s'a-m metéss a fèr al pentito...

SANDRONE: A-n fèr al gàggio, ch'agh n'avàmm bèle abàsta da mantgnìr...

SGORGHIGUELO: E alóra a màtt sò 'na bèla imprésa ed pulizî...

SANDRONE: Péz che andèr ed nòt... Làsa stèr, l'è méi ch'et rèst disocupê... A-i-ho pensê, invece, che cun cal magàt ch'a gh'avàmm a vói cumprèr soquànt Boc, ch'l'è po' un prèstit ch'a s'fa a la Cumùna...

PULONIA: E-t po' sicùr ch'i t-i dàghen indrê?

SGORGHIGUELO: Cambiàmm mo' descórs... Chè a Mòdna, al merchê, cum'é-la andèda a finìr la stòria dla mucca pazza?

SANDRONE: A pêr che ormai a sia tótt finî... Mè a m'éra inspavintê. Pèinsa che disàster s'a-i-avéssen duvû mazèr tótti el vàch dla stàla...

SGORGHIGUELO: Al péz al srév stê s'i avéssen duvû mazèr anch tótti chégli ètri...

SANDRONE: Mè a sò sól che in dla stàla a s'éra imbraghê anch al tòr, perchè la Giólia, la vàca, cun la stòria ch'l'éra finìda in di giornê, la s'éra muntèda la tèsta, e tótt el sìr la s'tirèva indrê e la gìva ch'la gh'avìva un poch d'emicrania...

PULONIA: Tótt al contràri ed quàl ch'a cà pita a cà nòstra, véra Sandròun?

SANDRONE: E alóra, c'sa duvrév-i-a dir mè, Pulonia, che l'étra nòt te-t'insugnèv d'éser a "Beato fra le donne" e in dal sàn a t'ho sintî dir: "Signor Bonolis... Mo' Sandrone... lo ficchi ben in piscina.... per quàl ch'al sérv..."

SGORGHIGUELO: E cun i stóren, papà, cum'é-la finìda?

SANDRONE: Finìda? I cuntìnuen a scagazèr in tèsta a i mudnés ch'l'è un piasèr... L'è dvintê un lavôr séri. Adèss, però, i m'han détt ch'i han truvê un sistéma per ràndri inoffensìv sèinza fèregh dal mèl...

SGORGHIGUELO: S'agh fan-i? Egh stòumpn-i al cul?

PULONIA: Tès, spurcaciòun. Tô pèder al gh'ha ragiòun. A l'ho sintî dir anca mè da la petnadóra.

SANDRONE: Un ascensór l'ha propòst ed druvèr al làser...

SGORGHIGUELO: Ma a-n n'è cal lavór chi dróven anch per el muròidi?

PULONIA: Mo' alòra, et fê apòsta. Duv'è-t imparê stél brótti paròl?

SGORGHIGUELO: Màma, l'è cólpa tô. T'ém di sèimper: guèrda la televisiòun acsè te dvèint meno ignorànt ed tô pèder...

SANDRONE: Bèla educaziòun ch'èt dê a cal galbéder ed tô fiól... A scumàtt ch'a-n sa gnànch ch'a duvàmm a tótt i càst andèr a Maastricht...

SGORGHIGUELO: Mo cus'é-l sté Màster chè? Mè a-n gh vói brìsa andèr...

SANDRONE: Te-n capéss pròpria gnint. In cal pòst lè, il prode Romano e tótt i sô amìgh dal guéren i gh déven andér per fòrza per entrér in Europa...

SGORGHIGUELO: Mo' papà, e se i nòster ministradór ed Ràmma i s'acuntintéssen... e invece d'andèr fin là, i decidéssen d'andèr a Vazéi... Pensa ech bel rispèrmi ch'a faréven tótt...

SANDRONE: Mè a dégh sól un quèl. S'a-s dév pròpia andèr a Maastricht andàmegh pór, ma sèinza ch'i s'fàghen paghèr al bigliàtt come s'a duvéssen andèr su la luna... E po', préma, a-n srév méi ch'andéssen a Sassól cun la strèda nóva?

SGORGHIGUELO: Vó-t dir ch'i àbien capì l'antìfona?

SANDRONE: Mè a spér, perchè i nòster ministradór i-n n'én pò ménga di gàggio... L'étr'an, per esempi, a-i-avàmm critichê al spartitràfic ed viale Fabrézzi, quall ch'al sembrèva stê méss apòsta per fèr un piasér ai caruzèr... Bèin, un lonedè ch'a sun gnû a Mòdna per vànder la vàca, a-i-ho vèst chi l'han tirê via...

SGORGHIGHUELO: Sè, i han tirê via qual ed vièl Fabrézzi, ma i n'han pò méss in quantitê in tótt chi éter viê... �t dév capìr... I caruzèr, ormai, i s'éren abituê...

SANDRONE: Làsa stèr... In giunta, di ministradór cun un pòch ed zervèl agh n'è incàrra. Un, per esèimpi, l'ha inventê di incrós con quéndes o sàdes semàfor...

SGORGHIGUELO: E a c'sa sérvn-i?

SANDRONE: Per dèr da lavurèr agli extracomunitari. A quàter per semàfor... i in sistémen 'na s'antèina a la vòlta. Acsè i pólen pulìr anch i fanê del ciclo e i ucê di pedòun...

SGORGHIGUELO: E po' i han inventê un bèl slogan: "Modena, città sicura e magnetica".

SANDRONE: Beh, lè a gh'avrév quèl da dir... A Mòdna l'unica sicuràzza l'è quàlla che i filibus i-n pàsen mai in oràri. E, cun chél nóvi machinàti ch'i gh'han méss per fèr i bigliàtt, se un a-n n'è ménga tògo a druvèr al computèr, l'è méi ch'al vàga a óngia...

SGORGHIGUELO: Piotòst, papà, te ch'èt sê ed làttra, nuèter dal Bosco ed Sàtta samm-i-a in Padania oppure no?

SANDRONE: Làsa stèr la politica ch'l'è na' gran brótta béstia. Mè a sò sól che in zémma el bandèri vérdi dla Lega i gh'han méss del tigèl...

PULONIA: Del tigèl? Ma el dann dla Lega li san-i po' fèr?

SANDRONE: Mo' cus'è-t capî? In zémma él bandéri, al gióren chi én andê in scampagnèda in riva al Po, quî dla Lega i gh'han méss al diségn del tigèl, perchè a pèr che i Celti, i nòster tris-tris-tris bisnòn padàn i magnéssen anca lór el chersentèini...

SGORGHIGUELO: Cun al persótt o cun al lèrd?

SANDRONE: Mo' c'sa vót ch'a sàpia mè... E po' basta cun la politica. Vè, Sgurghéghel, parlàmm bèin ed sport... �-t vést ech stràza d'argiulìda ch'a s'è dê la Feràri?

SGORGHIGUELO: Per forza, papà, l'è rivê diretamèint da la Fiat Luca di Monteprezémolo...

SANDRONE: Bèda ch'a-s dis Montezemolo, ignorànt...

SGORGHIGUELO: Mo' s'l'è sèimper dapertótt pròpia come al prezzemolo...

PULONIA: E alóra? C'sa gh'èintra Montezemolo?

SGORGHIGUELO: Da quand l'è rivê, la Ferrari l'è dvintèda piò areodinamica... Per forza, tótt i mecànich ed Maranèl i s'én ispirê a la linea ed sô muiéra, l'Edvige Fenèch... E adès la Feràri el curv la li tós benìssim...

PULONIA: Melnàtt d'un spurcaciòun, sèimper l'è et vê a parèr. �t pèr tô pèder.

SANDRONE: In ogni mòd, Sgurghéghel, l'a-n s'è ménga riprésa sól la Feràri. Anch al Mòdna a pèr che al viàza mèi ed l'an passê...

SGORGHIGUELO: L'è véra. Adèss ch'l'è andê via Degli Albertini i còunt i tórnen... Per furtùna che a fèr baràca nóva a gh'ha pensê Gigi Montagnani, quall dal Zèta Due, perchè s'a-n gnìva ménga un presidèint nóv, e finalmèint ed cà nòstra, la societê dal Mòdna la finìva a Bergnécch...

SANDRONE: Vè, Sgorghi, mè ed balòun a-n'in capéss poch, ma speràmm che al Mòdna, per via dla penalizaziòun a-n vàga in Z2 anca lò...

SGORGHIGUELO: A-n gh'è dóbbi, papà, cun Muntagnàn, piotòst, dal Z2 a s'andrà in A... Adèss l'è tótt divérs. Pèinsa che préma, quand i s'én acòrt che i pelegrèin chi gh'avìven i éren pòch, i n'han cumprèe un èter... Mo' a Mòdna l'è sèimper stèda acsè. V'arcurdèv Ulivieri, quall che adèss l'alèina al Bulègna? Agh n'avìven un bòun e a l'avàmm dê via. E pròpia al Bulègna... A-n psìven, almeno, dèrel a la Reggiana, ch'la gh'n'ha piò bisègn? Comunque, popà, se al Mòdna al duvéssa pròpia andèr mèl, mè a-m dagh al calcio femminile... El nòstri ragàzi el van via come di tréno. Papà, a vói fèr al masagiadór... A-m piès tant la Carolina...

SANDRONE: Mo' che masagiadór, te-n sê gnànch stergièr 'na vàca...

PULONIA: Tès mo' anca te, Sandròun, che in cà nòstra a-s sèint sól parlèr ed balòun, da la matèina a la sìra. Tè e tô fiól a i avî sequestrê la tivi. Fra i zìgh ed Mosca, el stupidà gin ed Biscardi e cla ghignósa dla Parietti ch'la fa vàdder tótt qual ch'la gh'ha infin sàtta al lasèin, a-m fê pérder sèimper el mê telenovèli. Ragazóli, e cun al taramòt v'sî-v inspavintèdi? Pensê che mè a-i-éra adrê a mónzer in dla stàla e a la Giólia a gh'è andê indrê al lat ed colp. E per dû dè, cun tótt chi squassamèint, invece dal lat la m'ha fat di panàtt ed butèr...

SGORGHIGUELO: E al galèini a gh'è gnû al stréccacul e e-n fan piò i óv gnànch a fèregh i cristéri. L'è trî mé? che la mama l'a-n me fa piò al zabaiòun. Ai stóren e ai pizòun, invece, a gh'è gnû la sciolta... Vè, papà, mo' tè al sè-t ed che grèd l'è stê l'ùltem taramòt?

SANDRONE: Cuma fàghia a savérel?

SGORGHIGUELO: Al taramòt l'è stê dal settimo grado della scala Husler, con epicentro in Svizzera, ma i dan al li ha fat a Mòdna...

SANDRONE: E tè dai, incàrra. A-n s'pól ménga scherzèr cun al taramòt! Dimàndi gèint la gh'ha avû di dan, perchè a gh'è gnû zà di pèz ed cà...

SGORGHIGUELO: Cum'é-la, alóra, che la borsa l'è andèda in scartòz anch sèinza al taramòt?

SANDRONE: Stràza d'un sumèr arivê sól fin a la térza alimentèr... Tès, mo', ch'l'è arivê al mumèint ed fèr ciacarèr un pòch tô mèdra, ch'l'ha quèsi tasû fin adèss...

PULONIA: Ragazóli ed tótti el tài, compresa l'XXXLLL, chi la fan sól al Bòsch ed Sàtta pròpia per mè, a- v salùt. Savî-v ch'a-m sùn méssa a dieta? A-i-ho vést in tivi la reclàm ed 'na cràmma dimagrànta e a l'ho cumprèda sèinza dir gnìnta a Sandròun. Al fat l'è ch'la pózza come un óndes. E alóra a-m sun dèda al fùtting, ch'a-n vól ménga dir ed cuntèr del fóti, ma córer... Acsè tótti el matèin a-m màtt in tuta e a fagh trî gìr ed córsa intorna a la ciàpa ed furmintòun dedré da cà...

SGORGHIGUELO: Al sè-t mo', mama, ch'a végn anca mè a fèr al fùtting tégh? Chissà ch'a-n me càla i cràss!

SANDRONE: Tès, galbéder, che a te a-n t'pól calèr gnanch al zervèl, perchè meno d'acsè...

PULONIA: Mo' smàttla ed turtièr cal pòver fiól... Ragazóli, sî-v già stèdi in fila per andèr a cumprèr a Grand Emilia? Sê? Dio, che sudisfaziòun. A parìva chi regaléssen la roba... Sandròun, invece, a-n me gh'ha incàrra vlû purtèr, cun la scusa che in cà a gh'avàmm de tótt...

SGORGHIGUELO: Bèda, mama, che, secànd mè, a la Brusèda, al papà, al gh'è bèle andê per sô còunt... L'èter dè l'è arivèda a cà, per arcmandèda, la fotografia dla targa dal sô baròz...

SANDRONE: Tès, mo', sumèr, che quand et descàr et dê dàn a un paés. A vrà dir che tô mèdra a la pòrt all'iper e tè a-t parcàg' lè davanti, dove a gh'è sèimper un gran pasàg' ed sgnurèini tótti abronzèdi...

PULONIA: Vè, Sandròun, l'è véra che in dl'òrt a gh'avàmm de tótt. Ma vó-t màtter? Pèinsa che al pandòr, a l'iper, i gh l'han in confezione sprai... E al fèr da stir disgnê da Giugiaro i l'han méss in vendita promozionale... E po', mè a vlìva una tivi stereotipàtica per sintìr méi quand a canta la Nilla a "Domenica In" cun cla bèla dunlèina dla Mara Venier... Gninta, al m'ha détt, aspetàmm éd vinzerla cun la lotteria ch'i fan a la polisportìva. Intànt, però, tótti el mê amìghi égli han cumprê chi la bicicletta da càmbra da lèt per tenersi in forma, chi al casco per fères la permanèint mèinter a s'è al cèso...

SGORGHIGUELO: Mama, e mè ch'a voi navighèr in Internèt?

SANDRONE: Cus'é-la, st'òstriga d'Internèt? 'Na bèrca? Vó-t navighèr? L'ha da éser un bèl spétacol vàder 'na paciàna come tè ch'et nud come un gat ed piàmb... E pò, s't'vó navighèr, va vérs la Bàsa. Lè, sól ch'a vègna dô gàz, a va dsóvra anch i bucalèin sàtta i lèt.

PULONIA: Descàr sèimper cum'a-s dév, vè. Fà-t bèin sèimper cumpatìr. Làsem mo' ciacarèr un pòch anca mè, che a cà a in patéss vóia...

SANDRONE: Sè, bàcca santa...

PULONIA: Dòunca, préma d'andèr via, a vói fèr soquànt salùt. Un l'è per al nòster nóv arzivàschev, mons. Benito Cocchi...

SANDRONE: Al namm al s'avìva un po' spavintê. A s'éren abituê cun un Santo... Adèsa cun un Benito, t'em capéss...

PULONIA: Tès't un pòch? A vói anch salutèr un personag' importànt, ch'al s'ha lasê per sèimper circa trî més fa... Giuseppe panini l'éra un amìgh dla Societê dal Sandròun e anch ed tótt i mudnês. A sun cunvìnta che anch lassò, a-n n'àbia brìsa desméss ed fèr del coleziòun e l'àbia bèle preparê el figurèini ed tótt i sant dal paradìs. E adèss a-v dév fèr 'n'arcmandaziòun. Dmànga nóv ed fervèr, purtê tótt i putèin in custóm a la Mascherina d'oro, al Teatro Sant'Agnese in piazzale Riccò. A-n ve descurdèdi ménga...

SGORGHIGUELO: A-m'arcmànd, ragazô, a v'aspêt tótt. E fê come mè, gnî cun la mama e al papà... A-v vói po' dir che pròpia in 'sta piaza chè a sun gnû al concerto dl'ùltem ed l'an, che oltre a la néva l'ha anch purtê mèl...

PULONIA: Perchè?

SGORGHIGUELO: Perchè al 31 ed diciàmber l'è gnû al cantànt "Liga-bue" e i prém ed znèr i-én gnû i carabàn per "lighèr" quî ed Concertòpoli...

SANDRONE: Tés, bagiàn, a-n's'dis brìsa chi lavór chè. E po' l'è gnû tèrd. L'è ora ed turnèr a cà. La srà dura saltèr fóra dal parcàg' dal Parco sèinza insturlères davanti cun al fìlibus o dedrê cun el màchini ch'el rìven. E po', per dirla come la vól détta, a m'è anch gnû da spànder àqua...

SGORGHIGUELO: Davéra? Sè-t, papà, ch'i han dèt che, per le celebrazioni di Modena capitale, dal 1998 i faràn anch tant pisadór nóv in ceintèr?

SANDRONE: A srév méi che i féssen subét, perchè agh n'è un gran bisègn. E pò, chi è bòun ed tgnìrla infin al nuvantòt? Piotòst, mudnês, dêv da fèr cum'a-i-avî sèimper fat. E a m'arcmànd, preghê San Zemiàn, che dàp ch'al s'è imparintê cun San Zeno per via dla banca, a pèr ch'a-s vóia trasferìr a Veròuna.. pròpia st'an ch'a gh'è la festa dal sô centenàri... In ogni modo, stê tranquél, che al nòster protetór al restarà ed sicùr in Dom. E vuèter, Zemiàn, stê incàrra de piò atachê a cla piòpa èlta e slanzèda, piantèda in dl'umbréghel ed Mòdna, ch'la s'ciàma Ghirlandèina.