La pensióun - Rino Balli

La pensióun

Quand te, t'è lavurè tota la vèta,
et vê in pensioun,
sta pór sicur che in men che non si dica
t've tot a sgarandèla.
I to os, la to cherna, al to zervel,
piò gnint funziouna.
I to pinser che prèma
i vulèven nei cieli più lontani,
i ein dvintè pasarèin che al premi pàni
i teintn'al vol, i specn'al so saltèin
e i caschn'in tera.
Al pez l'è ch'as capès quel ca sucèd,
e alòra at casca i braz...
Mo se un bel giorn et peins
ch'l'iva d'andèr acsè,
che tot è regolêr,
t'la tô cuma la vin
e po' t'aspet ca vegna cal mumèint
et tòret d'in di pe
e t'fe come i to amig
ch'is tiren zà al capel davanti i oc
e is mat'nal sol
sidù in d'un murizòl davsèin a ca
cun el man e la besla bein pugè
al màndeg d'un bastòn:
e i spèten...